धनगढी: डोटीमा कालु सिंह बिष्टको हत्या भएको छ। जिल्लाको दीपायल सिलगढी नगरपालिका-६, सिलगढीका ७५ वर्षीय कालुसिंह विष्टलाई प्रहरीले उनकै घरभित्र हत्या गरिएको अवस्थामा फेला पारेको हो।
परिवारका सदस्यहरूले बिहीबार बिहान विष्ट हराएको भन्दै प्रहरी कार्यालयमा दिएको जाहेरीका आधारमा प्रहरीले खोजतलास गर्ने क्रममा विष्टलाई बिहीबार उनी बस्ने घरकै कोठा भित्रै हत्या गरेर बाहिरबाट ढोकामा ताल्चा लगाइएको अवस्थामा प्रहरीले फेला पारेको हो। शव सड्न लागेको अवस्थामा भेटिएको जिल्ला प्रहरी कार्यालय डोटीका डीएसपी भीमलाल भट्टराईले बताए।
हत्यामा संलग्न भएको आरोपमा प्रहरीले दीपायल सिलगढी-६ सिलगढी बस्ने २२ वर्षीय सरोबर श्रेष्ठलाई पक्राउ गरी आवश्यक अनुसन्धान भइरहेको डीएसपी भट्टराईले बताए। श्रेष्ठले हत्या गरेको स्वीकारेको प्रहरीले जनाएको छ। मृतक विष्टको आइतबार अन्त्येष्टि गरिएको छ।