धनगढी: दार्चुलामा हाइस दुर्घटना हुँदा ५ जना घाइते भएका छन्। आज बिहान जिल्लाको शैल्यशिखर नगरपालिका-९ पडालमा १७ जना यात्रु सवार हाइस दुर्घटना भएको हो।
जिल्ला प्रहरी कार्यालय दार्चुलाका प्रहरी निरीक्षक कान्तिराज जोशीका अनुसार दार्चुलाबाट कञ्चनपुरको महेन्द्रनगरतर्फ आइरहेको बा ५ ख ५२६५ नम्बरको हाइस पल्टिएको हो।
दुर्घटनामा दार्चुलाको शैल्यशिखर नगरपालिका-६ का १४ वर्षीय जस्मिन धामी, शैल्यशिखर नगरपालिका-७ का ८० वर्षीय विष्णुदत्त जोशी, उनका नाति १० वर्षीय हिमांशु जोशी, कञ्चनपुरको वेदकोट नगरपालिका-७ की ४० वर्षीया बसन्ती विष्ट र सहचालक कैलालीको बर्दगोरिया गाउँपालिका-१ का २१ वर्षीय रोहित स्वाँर घाइते भएका छन्।
उनीहरूको अवस्था सामान्य छ। गोकुलेश्वरस्थित मालिकार्जुन अस्पतालमा उनीहरूको उपचार भइरहेको प्रहरीले जनाएको छ।
ब्रेक फेल भएर हाइस दुर्घटनामा परेको हुनसक्ने अनुमान प्रहरीले गरेको छ।