धनगढीः कैलालीको धनगढीमा म्याजिक र मोटरसाइकल एकआपसमा ठोक्किदा ७ जना घाइते भएका छन्। आइतबार दिउँसो धनगढीबाट अत्तरिया जाँदै गरेको सुदूरपश्चिम प्रदेश ०१–००१ ज १२६८ नम्बरको म्याजिकले मोहनापुल–अत्तरिया ६ लेन सडक अन्तर्गत चटकपुरमा सुदूरपश्चिम प्रदेश ०१००८ प १६३८ नम्बरको मोटरसाइकललाई ठक्कर दिँदा भएको दुर्घटनामा ७ जना घाईते भएका हुन् ।
दुर्घटनामा मोटरसाइकल चालक धनगढी उपमहानगरपालिका–३ का ५१ वर्षीय चन्द्र सेढाइ, म्याजिकमा सवार गौरीगंगा नगरपालिका–१ का १९ वर्षीय विशेष परियार, ५० वर्षीय अर्जुन तिम्सीना, ५० वर्षीय हरुजंग तिम्सीना, ३५ वर्षीय जसु भट्ट घाइते भएको प्रहरीले बताएको छ।
त्यस्तै धनगढी उपमहानगरपालिका–१३ का ३५ वर्षीय विष्णु चन्द, बझाङको मष्टा गाउँपालिका–४ का ४८ वर्षीय अम्मरराज उपाध्याय पनि घाइते भएका छन्। घाइतेहरुको मायामेट्रो अस्पतालमा उपचार भइरहेको छ। म्याजिक चालक गोदावरी नगरपालिका–६ का प्रेमबहादुर दमाइलाई प्रहरीले नियन्त्रणमा लिएको छ।