धनगढी : बाजुरामा एक गर्भवती महिलामाथि बलात्कार भएको छ। जिल्लाको हिमाली गाउँपालिकाकी ३५ वर्षीया एक महिलामाथि बलात्कार भएको हो।
दलित समुदायकी ती महिलालाई बलात्कार गरेको आरोपमा जंगसिंह बुढा नामका व्यक्तिलाई पक्राउ गरिएको जिल्ला प्रहरी कार्यालय बाजुराका डीएसपी कविन्द्र बोहराले बताए।
डीएसपी बोहराका अनुसार प्रहरीले पीडित महिलाका श्रीमान् रुपचन्द्र सुनार र देवर अम्मर सुनारलाई समेत पक्राउ गरेको छ।
बलात्कारमा संलग्न आरोप लागेका बुढालाई उनीहरूले कुटपिट गरेका थिए। सुनार पक्षले जवरजस्तीकरणीको मुद्दा प्रहरीमा दर्ता गरेको छ भने बुढा पक्षले कुटपिटको मुद्दा दर्ता गराएको छ।
दुई पक्षलाई थुनामा राखी अदालतबाट म्याद थप गरेर अनुसन्धान भइरहेको उनले बताए। पीडित महिलाका आफन्तले भने मुद्दा लिएर गएका श्रीमान र देवरलाई डीएसपी बोहराले थुनेको आरोप लगाए।
तर, डीएसपी बोहरा भने सो समयमा आफू जिल्लामा नरहेको बताउँछन्।