धनगढी : नेपाल प्रहरीमा १० प्रहरी बरिस्ठ उपरीक्षक (एसएसपी) र ३ प्रहरी उपरीक्षक (एसपी) अर्लि रिटायरको सूचीमा देखिएका छन्।
प्रहरीको किताबखाना स्रोतका अनुसार १० एसएसपी र ३ एसपी अर्लि रिटायरको सूचीमा देखिन्छन्।
उमेर र ३० वर्षे सेवाहदको कारण उनीहरु सो सूचीमा परेका हुन्। जसमा एसएसपी जीवनकुमार श्रेष्ठ (क), दिल्लीराज बिष्ट, रेवती ढकाल, किसनसिंह थापा र बेलबहादुर पाण्डे रहेका छन्।
यस्तै एसएसपी दिनेशराज मैनाली, रबिकुमार पाैडेल, नविनराज राई, वीरबहादुर ओली र चन्द्रदेव राई रहेका छन्।
एसपीमा भने हिराबहादुर पाण्डेय, रवीन्द्र रेग्मी र कृष्ण प्रसाईं रहेका छन्। यी सबै २०८१ मा अवकाशमा जाने बताइएको छ।
उसो त नेपाल प्रहरीमा ३० वर्षे सेवाहदको विषय फेरि उठेको छ। गृह मन्त्रालयले सेवाहद हटाउनुपर्ने विषयमा तयारी थालेको बताइन्छ।
गत मंसिरमा शेरबहादुर देउवा नेतृत्व सरकारले अध्यादेशमार्फत प्रहरी ऐन संशोधन गरी सेवाहद हटाउने प्रयास गरेको थियो। तर, त्यसले मूर्त रूप पाएन। अहिले यो विषयमा गृह मन्त्रालयले फेरि पहल थालेको बुझिएको छ।