धनगढी : बझाङमा ट्याक्टर दुर्घटना भएको छ । जिल्लाको तलकोट गाउँपालिका – १ अन्तर्गतको सुनिगाड पुल नजिकै ट्याक्टर दुर्घटना भएको हो ।
शनिबार दिउँसो १ बजेको समयमा तलकोटबाट सदरमुकाम चैनपुर आउनेक्रममा सुनिगाड पुल नजिकै से २ त ३५४७ नम्बरको ट्याक्टर दुर्घटना भएको जिल्ला प्रहरी कार्यालय बझाङले जनाएको छ ।
ट्याक्टर सडकबाट अन्दाजी ४० मिटर तल खसेको छ । ट्याक्टर चालक बैतडी पुर्चौंडी नगरपालिका ४ का ३५ वर्षीय सागर बोहरा घाइते भएका छन् ।
चालक बोहराको टाउको, बायाँ आँखा र ढाडमा चोट लागेको बताइएको छ । उनको जिल्ला अस्पताल बझाङमा उपचार भइरहेको छ । दुर्घटना सम्बन्धि थप अनुसन्धान भैरहेको जिल्ला प्रहरी कार्यालय बझाङका सूचना अधिकारी दिपेश चौधरीले बताए ।
Facebook Comments Box