काठमाडौं – भरुवा बन्दुकसहित प्रहरीले दाङमा एक जनालाई पक्राउ गरेको छ ।
राजपुर गाउँपालिका–१ कटवेरुवा निवासी ४२ वर्षीय रामबहादुर चौधरीलाई पक्राउ गरिएको जिल्ला प्रहरी कार्यालय दाङका प्रवक्ता राजनकुमार गौतमले जानकारी दिए ।
चौधरीलाई गढवा गाउँपालिका–७ स्थित ज्योति सामुदायिक वन सिकार खेल्न गएका छन् भन्ने सूचनाका आधारमा पक्राउ गरिएको प्रहरीले बताएको छ।
चौधरीको साथबाट अवैध रुपमा रहेको एक थान भरुवा बन्दुक, २ वटा फलामको छर्रा र १ वटा गोली कपडाको टुक्रा र कालो रङको बारुदजस्तो धुलो पदार्थ बरामद भएको छ। भरुवा बन्दुकमा प्रयोग हुने फलामको गोली थान –१९, फलामका साना ठुला छर्रा थान–१२६ , कपडाको सानाठूला टुक्रा थान–१२, गोल्डी हिंग लेखिएको सानो प्लाष्टिक डिब्बा भित्र केप थान–४ , २ वटा प्लाष्टिक डिब्बामा कालो रङको बारुद जस्तो देखिने धुलो पदार्थ अन्दाजी २०० ग्राम समेत बरामद गरेको प्रवक्ता गौतमले बताए। चौधरीलाई नियन्त्रणमा लिएर आवश्यक अनुसन्धान भइरहेको दाङ प्रहरीले बताएको छ ।