डोटी – नेकपा एमालेका अध्यक्ष केपी शर्मा ओलीले वर्तमान गठबन्धन विकास र समृद्धिका लागि नभई भागबण्डाका लागि भएको आरोप लगाएका छन् ।
नेकपा एमाले जिल्ला कमिटी डोटीले दिपायलमा आयोजना गरेको बृहत् आमसभालाई सम्बोधन गर्दै अध्यक्ष ओलीले उक्त आरोप लगाएका हुन् । “विभिन्न दलहरूबीच जुन गठबन्धन भएको छ त्यो देशको विकास समृद्धिका होइन, राष्ट्रियताप्रति चिन्ता र चोसो छैन” पूर्व प्रधानमन्त्री समेत रहेका ओलीले भने “केबल जनतालाई झुटा आश्वासन दिएर चुनाव जित्नु र पछि भागबण्डा गरेर खानु एउटा मात्र उद्देश्य हो ।”
मंसिर ४ पछि नेकपा एमालेको नेतृत्वमा सरकार बन्ने दाबी गर्दै ओलीले सुदूरपश्चिम प्रदेशका राष्ट्रिय महत्त्वका योजनाहरू पश्चिम सेती, खुटिया दिपायल फास्ट ट्रयाक, सहजपुर बोगटान राजमार्गलाई पूर्णता दिने, लिपुलेक लिम्पियाधुरालाई नक्सामा कायम गरे जस्तै भूमि फिर्ता गर्ने बताए ।
सत्ता गठबन्धनको तर्फबाट प्रतिनिधि सभाका उमेद्बार बनेको नेकपा एकीकृत समाजवादीका पोलिट ब्युरो सदस्य प्रेम बहादुर आले मगरले मन्त्री पदमा रहँदा बोलेको भाषाले गर्दा डोटीको मात्र नभई राष्ट्रको समेत बेइज्जत गरेको यस्ता व्यक्तिलाई जिताउनु डोटीको लागि दुर्भाग्य भएको आरोप लगाए ।
नेपाली काँग्रेसका प्रतिनिधि सभाका सदस्यका उम्मेदवारलाई पाखा लगाएर आले आफू हाबी भएको ओलीले बताए । उनले भने ‘काँग्रेसका उम्मेदवारलाई ओरालो बगाएर कैलाली पुर्याए काङ्ग्रेसकै भोटले आले जित्न चाहँदैन, काँग्रेसका कार्यकर्ताहरूलाई उनले किन भोट दिने ।