प्रधानमन्त्री पुष्पकमल दाहाल प्रचण्डले नेपाली राष्ट्रिय क्रिकेट टोलीलाई बधाई दिएका छन् । आइसिसी विश्वकप लिग टू क्रिकेट अन्र्तगत त्रिवि मैदानमा त्रिकोणात्मक एक दिवसीय खेलमा लगातार तीन जित निकालेको नेपाली टोलीलाई प्रधानमन्त्री प्रचण्डले बधाई दिएका हुन् ।
प्रचण्डले एक ट्वीट गर्दै नेपाली टोलीलाई बधाई दिनुका साथै सरकारका तर्फबाट प्रोत्साहन स्वरुप पुरुस्कार दिने समेत जनाउनुभएको छ । उनले भनेका छन्,काठमाडौंमा जारी आइसिसी पुरुष क्रिकेट लिग टु अन्र्तगत त्रिकोणात्मक श्रृङखलाबाट उत्कृष्ट प्रदर्शनबाट लगातार तेस्रो जित निकाल्न सफल भएकोमा नेपाली टिमलाई हार्दिक बधाई ज्ञापन गर्दै उत्कृष्ट खेलाडीहरुलाई सरकारको तर्फबाट प्रोत्साहित र पुरस्कृत गरिने विश्वास दिलाउन चाहन्छु,। नेपालले त्रिवि मैदानमा खेल्ने चार खेलमध्ये ३ खेलमा लगातार जित निकालेको छ । नेपालले नामेवियालाई दुई खेलमा र एक खेलमा स्कटल्याण्डलाई हराएको हो ।
नेपालले भोलि फेरी स्कटल्याण्डसंग खेल्नेछ । सन् २०१९ बाट सुरु भएको आईसीसी विश्वकप लिग टू अन्तर्गत नेपाल अहिले तालिकाको छैटौं स्थानमा रहेको छ । नेपालको २४ अंक रहेको छ । शीर्ष ५ भित्र अटाए एक दिवसीय वरियता जोगिने भएकाले पनि नेपालका सबै खेल निकै महत्वपूर्ण रहेका छन् । नेपालले लिग टु मा खेल्न बाँकी ९ खेलमध्ये ६ खेल जिते शिर्ष ५ मा रहन्छ ।