डडेल्धुराः डडेल्धुराको अमरगढी नगरपालिकामा सम्पन्न टोल स्तरीय वडा कप भलिबलको उपाधि आयोजक बैजनाथ महिला कृषि समूह ‘ए’ ले हात पारेको छ।
शनिबार भएको फाइनल खेलमा सिद्धनाथ युवा क्लब चिरकिट्टेलाई ३–१ ले हराउँदै आयोजकले उपाधि हात पारेको हो।
उपाधिसँगै आयोजकले नगद १२ हजार एक रूपैयाँसहित ट्रफि हात पार्न सफल भयो भने सिद्धनाथ युवा क्लबले सात हजार एक रूपैयाँमा चित्त बुझायो।
यस्तै किङ्स सोल्परीले शिखर सहकारीलाई पराजित गर्दे तृतीय स्थान हासिल गर्न सफल भयो। किङ्स सोल्परीले चार हजार एक रूपैयाँ पुरस्कार प्राप्त गर्यो।
अमरगढी नगरपालिका–२ र ३ को काँडे कोटमा बैजनाथ कृषि समूहको आयोजना र अमरगढी नगरपालिका वडा नम्बर २ र ३ को प्रायोजनमा हिजोदेखी खुला वडा कप भलिबल प्रतियोगिता भएको थियो।
भलिबल प्रतियोगितामा २ र ३ नम्बर वडाका १० वटा टिमको सहभागीता रहेको थियो।
विजया दशमी, शुभ दिपावली तथा छठ पर्वको सुखद उपलक्ष्यमा नेपालको राष्ट्रिय खेल भलिबललाई विकास तथा उजागर गर्नको लागि प्रतियोगिता आयोजना गरिएको थियो।