दोलखा – दोलखाको बैत्यश्वर गाउँपालिकाको मतदान केन्द्रमा भएको झडप रोकिएपछि मतदान सुरु भएको छ । सर्वदलीय बैठक बसेर सहमति भएपछि मतदान सुरु भएको दोलखा प्रहरी प्रमुख डीएसपी गंगा पौडेलले जानकारी दिए । नेपाली कांग्रेस र नेकपा एमाले कार्यकर्ताबीच झडप भएपछि मतदान रोकिएको थियाे । पालिकाको वडा नम्बर १, २ र ३ का मतदानस्थलमा सुरु भएलगत्तै दुई पक्षबीच झडप भएको थियो । मतदान भइरहेको बेला ढुंगा प्रहार भएपछि प्रहरीले स्थिति नियन्त्रणमा लिन दुई राउन्ड हवाई फायर समेत गरेको पौडेलले बताए । मतदाता आउने बाटो अवरोध गरेर कांग्रेस र एमाले कार्यकर्ताहरूले बुथ कब्जा गर्ने प्रयत्न गरेका थिए ।
Author: महेन्द्रनगर पोष्ट
काठमाडाैं – नेपाली कांग्रेसका महामन्त्री विश्वप्रकाश शर्माले झापाको मेचीनगर नगरपालिका-९ को कवि शिरोमणि मतदान केन्द्रमा मतदान गरेका छन् । स्थानीय तहको निर्वाचन अन्तर्गत उनले आज बिहान उनले मतदान गरेका हुन् ।
काठमाडौं – स्थानीय तह सदस्य निर्वाचन अन्तर्गत देशभर मतदान भइरहेको छ । ७५३ पालिकाका लागि भएको मतदानमा बिहान ११ बजेसम्म २५ प्रतिशत मत खसेको निर्वाचन आयोगले जनाएको छ । आयोगका प्रवक्ता शालिग्राम शर्मा पौडेलले बिहान ११:१५ सम्मको अपडेटमा औसत २५ प्रतिशत मत खसेको जानकारी दिए । बिहान ७ बजेदेखि साँझ ५ बजे सम्म मतदाताले जनप्रतिनिधि चुन्नका लागि मतदान गरिरहेका छन् । देशका ७७ जिल्लाका १० हजार ७ सय ५६ मतदानस्थलका २१ हजार ९ सय ५५ मतदान केन्द्रहरूमा १ करोड ७७ लाख ३३ हजार ७ सय २३ मतदाताले मतदान गर्दैछन् ।
काठमाडौँ – ओखलढुङ्गाको चम्पादेवी गाउँपालिकास्थित वडा नम्बर ९ को एक मतदान केन्द्रमा मतदान स्थगित भएको छ । मतदानका क्रममा विवाद हुँदा मतदान स्थगित भएको हो । अहिले सर्वदलीय बैठक बसेर मतदान सुचारु गराउन पहल भइरहेको छ । यस्तै माथिल्लो डोल्पामा पनि तनाव भएको खबर प्राप्त भएको छ । यद्यपि त्यहाँको पछिल्लो अवस्था प्राप्त हुन नसकेको प्रहरी प्रवक्ता विष्णु केसीले जानकारी दिए । फोन सम्पर्क हुन नसक्दा अद्यावधिक विवरण प्राप्त हुन नसकेको हो । यसैगरी भोजपुरको कुलुङ गाउँपालिकामा केही केही मतदान केन्द्रका पनि मतदान सुरु हुन सकेको छैन ।
काठमाडौं – रामेछापको दोरम्बा, सैलुङ र खाँणदेवीमा झडप भएपछि प्रहरीले हवाई फायर गरेको छ। खाँणदेवी गाउँपालिकास्थित वडा नम्बर १ राकाथमा मतदान केन्द्रमा दुई पक्षबिच झडप भएको हो। झडप नियन्त्रणका लागि प्रहरीले ७ राउण्ड हवाई फायर गरेको प्रमुख जिल्ला अधिकारी दीपककुमार पहाडीले जानकारी दिए। झडप पछि राकाथामा मतदान केन्द्रको मतदान प्रभावित भएको छ। यस्तै दोरम्बा सैलुङ गाउँपालिकाको मानपुर कृष्ण मावि मतदान केन्द्रमा दुई पक्षीय झडप भएको छ। बाहिर झडप भए पनि भित्र मतदान चलिरहेको प्रमुख जिल्ला अधिकारी पहाडीले जानकारी दिए।
काठमाडौँ – प्रधानमन्त्री शेरबहादुर देउवाले मतदान गरेका छन् । काँग्रेस सभापतिसमेत रहेका देउवाले गन्यापधुरा गाउँपालिकाको रुवाखोलास्थित असिग्राम मावि मतदान केन्द्र ‘ख’ बाट मतदान गरेका हुन् । मतदानका लागि प्रधानमन्त्री देउवा शुक्रबार बिहानै धनगढीबाट डडेल्धुरा पुगेका थिए ।
भरतपुर – भरतपुर महानगरपालिका मेयरकी उम्मेदवार रेनु दाहालले मतदान गरेकी छन् । उनी र उनकी बहिनी गंगा दाहालले भरतपुर–१४ स्थित आधारभुत विद्यालय सुन्दरवस्तीबाट मतदान गरेका हुन् । उनीहरुका पिता एवं माओवादी अध्यक्ष पुष्पकमल दाहाल प्रचण्डले चितवनबाटै मतदान गरिसकेका छन् । भरतपुरको निर्वाचन अहिले देशभरिका जनताका लागि चासोको विषय बनेको छ । यहाँ एमालेबाट विजयी सुवेदी र कांग्रेसका बागी उम्मेद्धवार जगन्नाथ पौडेल चुनावी प्रतिष्पर्धामा छन् ।
अछाम- मतदान केन्द्रमा उपस्थित नभएका व्यक्तिको नाममा मतदान गर्न खोज्दा अछामको साँफेबगर न गरपालिका–१३ बाब्लास्थित मतदान केन्द्रमा अवरोध सृजना भएको छ । नेकपा एमालेका कार्यकर्ताले अर्काको नामबाट मतदान थालेपछि रोक्न खोज्दा अवरोध गरेका हुन् । त्यहाँ एमाले र गठबन्धनका उम्मेदवारबीच कडा प्रतिस्पर्धा हुने आकलन गरिएको छ । बिहानदेखि सौहार्दपूर्ण वातावरणमा मतदान भइरहेको बेला एमालेका कर्याकर्ताले उपस्थित नै नभएकाहरूको नामबाट मतदान गर्न थालेपपछि रोक्न खोज्दा अवरोध भएको स्थानीयले बताएका छन् । उनीहरूलाई रोक्न खोज्दा उल्टै आक्रमणमा उत्रिएपछि दोहोरो झडप भएको हो । झडपमा केही व्यक्तिहरु घाइते भएका छन् । अहिले मतदान पनि रोकिएको छ । दुई पक्षबीच झडप हुँदा मतदान केन्द्रसमेत…
काठमाडौं – हुम्लामा मतदानका क्रममा झडप भएको छ । एक समूहले प्रहरीमाथि ढुंगामुढा गरेपछि प्रहरीले ७ राउण्ड गोली समेत चलाएको छ । माथिल्लो हुम्लाको तंखेली गाउँपालिका २ स्थित महादेव मावि मतदान केन्द्रमा सो तनाव भएको हो भने मतदान अधिकृतसहित २ जना घाइते भएका छन् । मतदान अधिककृत कृष्ण प्रसाद आचार्य र कार्यालय सहयोगी घाइते भएको कर्णाली प्रदेश कार्यालयका एसएसपी राजेश नाथ बास्तोलाले जानकारी दिएका छन ।
काठमाडौं – काठमाडौँ महानगरपालिकाको प्रमुखका उम्मेदवार सिर्जना सिंहले मतदान गर्नुभएको छ । नेपाली कांग्रेसका उम्मेदवार उहाँले कामपा–१६ पकनाजोलस्थित नेपाल युवक माध्यामिक विद्यालयमा रहेको केन्द्रबाट मतदान गर्नुभएको हो । मतदानपछि सञ्चारकर्मीसँग प्रतिक्रिया दिँदै उहाँले काठमाडौँको फोहरमैला व्यवस्थापन, ट्राफिक जाम हटाउने र सुरक्षित सहर बनाउने आफ्नो प्रतिबद्धता रहेको बताउनुभयो । कांग्रेसका पूर्व महामन्त्री प्रकाशमान सिंहले पनि सोही मतदान केन्द्रबाट मतदान गर्नुभएको छ । मतदानपछि सञ्चारकर्मीसंग कुराकानी गर्दै उहाँले लोकतन्त्रलाई सुदृढ बनाउन निर्वाचन महत्वपूर्ण भएकाले आफ्नो मताधिकार प्रयोग गर्न आम मतदाताई आग्रह गर्नुभयो । उहाँले भन्नुभयो “ गठबन्धन देशको आवश्यकता हो ।”