कैलाली: कैलालीको विभिन्न स्थानबाट लागुऔषधसहित एकैदिन ४ जना युवक पक्राउ परेका छन्।
धनगढी उपमहानगरपालिका-६ मट्यारीबाट १५० मिलिग्राम खैरो हेरोइनसहित सोही ठाउँ बस्ने २० वर्षीय राघव चौधरीलाई बिहीवार दिउँसो प्रहरीले पक्राउ गरेको हो। वडा प्रहरी कार्यालय धनगढीबाट खटिएको प्रहरी टोलीले खैरो हेरोईनसहित चौधरीलाई फेला पारी पक्राउ गरेको जनाएको छ।
यस्तै गोदावरी नगरपालिका-८ स्याउले भित्री सडक खण्डबाट ४१० मिलिग्राम खैरो हेरोइनसहित धनगढी उपमहानगरपालिका-११ बस्ने २६ वर्षीय दानबहादुर राना बिहीवार साँझ पक्राउ परेका छन्। रानालाई अस्थाई प्रहरी पोष्ट श्रीपुर, कैलालीबाट खटिएको प्रहरी टोलीले पक्राउ गरेको प्रहरीले बताएको छ।
टीकापुर नगरपालिका-१ जमरापारी टीकापुर बहुमुखी क्याम्पस नजिक सडक खण्डबाट १ ग्राम ५९० मिलिग्राम खैरो हेरोइनसहित सोही ठाउँ बस्ने २० वर्षीय सागर चौधरी र टीकापुर-९ बस्ने ३२ वर्षीय राजकुमार चौधरी पनि बिहीवार साँझ पक्राउ परेका छन्। दुवै जनालाई सुदूरपश्चिम प्रदेश प्रहरी कार्यालय धनगढी र ईलाका प्रहरी कार्यालय टीकापुरबाट संयुक्त रुपमा खटिएको प्रहरी टोलीले पक्राउ गरेको जनाएको छ।
पक्राउ परेका चारै जनामाथि थप अनुसन्धान गरिरहेको प्रहरीले बताएको छ।