काठमाडौं : नेपाल प्रहरीमा प्रहरी अतिरिक्त महानिरीक्षक (एआईजी) दीपक थापालाई निमित्त आईजीपीको जिम्मेवारी दिइएको छ। उता सशस्त्र प्रहरी बल नेपालमा भने नारायणदत्त पौडेललाई निमित्तको जिम्मेवारी दिइएको छ।
प्रहरी महानिरीक्षक (आईजीपी) बसन्तबहादुर कुँवर र सशस्त्र प्रहरी महानिरीक्षक राजु अर्याल यूएनकप्स समिटमा सहभागी हुन आज (सोमबार) अमेरिका प्रस्थान गरेपछि थापा र पौडेललाई कार्यवाहकको जिम्मेवारी दिइएको हो। उनीहरुले प्रधान कार्यालयको दैनिक प्रशासनिक कामकाजको जिम्मेवारी सम्हाल्नेछन्।
गृहसचिव एक नारायण अर्याल नेतृत्वको ५ सदस्यीय नेपाली प्रतिनिधि मण्डल संयुक्त राष्ट्रसंघको प्रधान कार्यालय अमेरिकाको न्यूयोर्कमा असार १२ देखि १३ सम्म संचालन हुने चौथो युनाइटेड नेशन्स चिफ्स अफ पोलिस समिट (यूएनकप्स) मा सहभागी हुन सोमबार त्यसतर्फ प्रस्थान गरेको छ।
समिटमा गृहसचिव, आइजीद्वयसहित प्रहरी नायब महानिरीक्षक दानबहादुर कार्की र सशस्त्र प्रहरी वरिष्ठ उपरीक्षक समेत त्यसतर्फ प्रस्थान गरेका हुन्।
गृह सचिव अर्यालको नेतृत्वमा रहेको टोलीलाई प्रहरी अतिरिक्त महानिरीक्षकहरू, प्रहरी नायब महानिरीक्षकहरू, गृह मन्त्रालयका पदाधिकारीलगायत अधिकारीहरूले त्रिभुवन अन्तर्राष्ट्रिय विमानस्थलमा बिदाइ गरेका थिए।