काठमाडौं: फाइनलमा नेपाललाई २-१ ले पराजित गर्दै साफ महिला च्याम्पियनसिप-२०२४ को उपाधि बङ्लादेशले जितेको छ। बङ्लादेशले लगातार दोस्रो पटक साफको उपाधि जितेको हो।
बुधबार त्रिपुरेश्वरस्थित दशरथ रंगशालामा सम्पन्न खेलमा बङ्लादेशलाई जित दिलाउन मोनिका चक्मा र रितु पोर्ना चक्माले गोल गरिन्। नेपालकी अमिशा कार्कीले गोल फर्काए पनि नेपालको हार टार्न सकिनन्। तीनै गोल दोस्रो हाफमा भएको हो।
खेलको ५२औं मिनेटमा मोनिका चक्माले गोल गर्दै बङ्लादेशलाई अग्रतामा राखेकी थिइन्। कप्तान सविना खातुनले नेपाली रक्षकबाट भएको गल्तिको फाइदा उठाउदै निकालेको बललाई नियन्त्रणमा लिदै मोनिकाले गोल गरेकी थिईन्।
तर नेपालले चार मिनेटमै गोल फर्कायो। नेपालकी अमिशा कार्कीले गोल गर्दै नेपाललाई बराबरीमा फर्काएकी हुन्। प्रीति राईले निकालेको थ्रु-बललाई नियन्त्रणमा लिदै अमिशाले सहजै गोल गरिन्।
८१औं मिनेटमा रितु पोर्ना चक्माले गोल गर्दै बङ्लादेशलाई २-१ को अग्रतामा राखिन्। करिब २५ यार्ड परबाट रितुले उत्कृष्ट गोल गरेकी हुन्। यहि गोल निर्णायक बन्दा बङ्लादेश च्याम्पियन बनेको हो।
यसअघि सन् २०२२ को संस्करणमा नेपाललाई बाङ्लादेशले ३-१ ले हराएको थियो।
नेपाली महिला टिमले हारेको यो १२औं फाइनल हो। साफम मात्रै नेपाल फाइनलमा पराजित भएको यो छैटौं पटक हो।