काठमाडौँ: प्रहरी प्रधान कार्यालयले केही डीएसपी र इन्स्पेक्टरहरूको काज सरुवा गरेको छ। उपत्यकाका केही प्रमुख वृत्तका नेतृत्व फेरिएसँगै अन्य इलाका प्रहरी कार्यालयहरूमा पनि अधिकृतहरूको जिम्मेवारी हेरफेर गरिएको छ।
स्रोतका अनुसार मालदार एक आकर्षक पोष्टिङ मानिने सोह्रखुट्टे वृत्तमा सिआइबीमा कार्यरत डीएसपी जागेश्वर भण्डारीलाई सरुवा गरिएको छ। उनी नेपाली काङ्ग्रेसका नेताको सिफारिसमा त्यहाँ पुगेको बताइन्छ।
सोह्रखुट्टे क्षेत्रमा क्लब तथा रात्री व्यवसायको हब भएकाले प्रहरीले आकर्षक पोष्टिङ मान्ने गरेका छन्। यसअघि सोह्रखुट्टे वृत्तमा डीएसपी सत्यनारायण थापा कार्यरत थिए, जसको एक वर्षे अवधि पूरा भएको थियो।
त्यस्तै, सिंहदरबार वृत्तमा डीएसपी वेद बहादुर पौडेललाई खटाइएको छ, जहाँ यसअघि डीएसपी चक्रबहादुर शाह कार्यरत थिए।
अन्य स्थानमा पनि डीएसपीहरूको काज सरुवा भएको छ। इप्रका सिमरामा डीएसपी सुभद्रा वाइवा, इलाका प्रहरी कार्यालय गौशालामा उत्तम सिंह भण्डारी, र इलाका प्रहरी कार्यालय पटेर्वा, पर्सामा प्रकाश थापालाई पठाइएको छ।
यसका साथै, केही इन्स्पेक्टरहरूको पनि काज सरुवा भएको छ। जसमा इलाका प्रहरी कार्यालय गौशाला महोत्तरीमा उत्तमसिंह भण्डारी र ईप्रका पटेर्वा पर्सामा प्रकाश थापा पठाइएका छन्। त्यस अगाडि पनि केही इन्सपेक्टरको काज गरिएको थियो।