काठमाडौं: नेपाल प्रहरी अस्पताल नर्सिङ विभाग, महाराजगंजमा कार्यरत प्रहरी उपरीक्षक (एसपी) लालबाबु गिरीलाई वरिष्ठ उपरीक्षक (एसएसपी) पदमा बढुवा सिफारिस गरिएको छ।
बिहीबार बसेको बढुवा समितिको बैठकले प्राविधिक प्रहरी समूह, स्वास्थ्य उपसमूह, नर्सिङ्गतर्फका गिरीलाई एसएसपीमा बढुवा सिफारिस गरेको हो। प्रहरी प्रधान कार्यालयका अनुसार यो सूची प्रहरी नियमावली, २०७१ (संशोधन सहित) को नियम २७ को उपनियम (४) अनुसार सार्वजनिक गरिएको हो।
यस्तै, आजै जनपदतर्फ रिक्त पाँच डीआईजी पदमा पाँच एसएसपीलाई बढुवा सिफारिस गरिएको छ। डीआईजीमा बढुवा सिफारिस भएका अधिकारीहरूमा ईश्वर कार्की, राजेन्द्र प्रसाद भट्ट, दिनेश कुमार आचार्य, अरुण पौडेल, र गोबिन्द थपलिया रहेका छन्।
एसपीबाट प्राविधिकतर्फको एसएसपी बढुवा गरिएकोमा जनपदतर्फ भने रिक्त दरबन्दीमा अझै बढुवा गरिएको छैन। रिक्त दरबन्दी कम र बढुवाका लागि दौडधुप गर्दै शक्तिकेन्द्रबाट दबाब दिनेहरुको चलखेलका कारण बढुवा रोकिएको बताइन्छ। यद्यपि केही समयमै बढुवा गरिने जनाइएको छ।
