काठमाडौं – सिन्धुपाल्चोक स्थित चौतारा साँगाचोकगढी नगरपालिका–१ स्याउमा श्रीमतीलाई घरायसी वादविवादको क्रममा हत्या गरेको आरोपमा मंगलबार राति प्रहरीले एक जनालाई पक्राउ गरेको छ । पक्राउ पर्नेमा चौतारा साँगाचोकगढी नगरपालिका–१ स्याउले बस्ने ४४ वर्षीय मेख बहादुर तामाङ रहेका छन् ।
जिल्ला प्रहरी कार्यालय सिन्धुपाल्चोकबाट खटिएको प्रहरीले उनलाई पक्रेको हो । तामाङले चिर्पट र ढुङ्गा प्रहार गरी ४४ बर्सिया श्रीमती सुकुमाया तामाङको हत्या गरेको प्रहरीले जानकारी दिएको छ ।
घरायसी वादविवादको क्रममा तामाङले श्रीमतीलाई चिर्पट र ढुङ्गा प्रहार गर्दा उनी गम्भीर घाइते भएकी थिइन् । गम्भीर घाइते सुकुमायाको जिल्ला अस्पताल चौतारामा उपचारको क्रममा मृत्यु भएको प्रहरीले जनाएको छ ।
जिल्ला प्रहरी कार्यालय सिन्धुपाल्चोकका अनुसार घटनाको सम्बन्धमा थप अनुसन्धान भइरहेको छ ।
Facebook Comments Box