उदयपुर – उदयपुरको बेलका नगरपालिकाको कोशी जनता माध्यामिक विद्यालय रामपुरमा अध्ययनरत कक्षा १० मा छात्रा कविता सुनुवारको हत्या अभियोगमा दुईजना पक्राउ परेका छन् ।
उनको हत्याको अभियोगमा उनकै सहपाठी सरिता ढकाल खत्री र १९ वर्षका राजेन्द्र ढकाल पक्राउ परेका छन् ।
केही दिनअघि सरिता र कविताबीच सामान्य झगडा परेकोले सोही रिसमा सरिताले राजेन्द्रलाई बोलाएर कविताको हत्या गरेको प्रारम्भिक अनुसन्धानमा खुलेको प्रहरीले जनाएको छ ।
प्रहरीका अनुसार उनीहरुले बिहान साढे ५ बजेतिर कवितालाई यसोदा खोलामा आइपुगेपछि ढुंगाले टाउकोमा प्रहार गरेर हत्या गरेको अनुमान छ ।
एसईई तयारी गरिरहेकी सुनुवारको बिहान ट्युसन पढ्न आउँदै गर्दा यसोदा खोलामा हत्या भएको थियो । उनको शव स्थानीयले बिहान ७ बजे देखेपछि प्रहरीलाई खबर गरेका थिए । प्रहरीले घटनाबारे अनुसन्धानपछि मात्रै विस्तृत विवरण आउने जनाएको छ ।