कैलाली: कैलालीको चिसापानीबाट एक व्यवसायी लापता भएका छन्। सुर्खेत उद्योग वाणिज्य संघका महासचिव भद्र भण्डारी सम्पर्कविहीन भएका हुन्।
न्यू बुलबुले अटो सेल्सका सञ्चालकसमेत रहेका भण्डारी केही दिनदेखि सम्पर्कविहीन भएको प्रहरीले जनाएको छ।
भण्डारी चढ्ने गाडी सुदूरपश्चिम प्रदेशको इलाका प्रहरी कार्यालय कर्णाली, चिसापानीको नियन्त्रणमा रहेको कार्यालयका प्रहरी निरीक्षक टेकराज जोराले जानकारी दिए। उनका अनुसार भण्डारीले प्रयोग गर्ने बा १८ च ९८७५ नम्बरको गाडी बिहीबार कैलालीको लम्कीचुहा नगरपालिका कर्णाली चिसापानीस्थित एक होटलमा बेवारिसे अवस्थामा भेटिएको थियो।
प्रहरी निरीक्षक जोराले भण्डारीका मोबाइल, गाडीको चाबीलगायत सामान गाडीमै भेटिएको जानकारी दिए।
सुर्खेत उद्योग वाणिज्य संघका अध्यक्ष लक्ष्मण कँडेल पनि भण्डारी खोज्न कँडेल कञ्चनपुर पुगेका छन्। महासचिव भण्डारी सम्पर्कविहीन हुनुको कारण खुल्न सकेको छैन।