धनगढी : सुदूरपश्चिम प्रदेश सभा अगाडि थाल ठटाएर प्रदर्शन गरिने भएको छ।
गेटामा विश्वविद्यालय सञ्चालनको माग गर्दै संघर्ष समितिले बिहीवार (भोलि) दिउँसो ३ बजेदेखि प्रदेश सभा प्रवेशद्वारमा थाल ठटाएर प्रदर्शन गर्न लागेका हुन् ।
गेटामा विश्वविद्यालय स्थापना गर्ने गत माघ २९ गतेको निर्णयअनुसार विश्वविद्यालय ऐन निर्माण गर्न र गेटामा सहिद दशरथ चन्द राष्ट्रिय स्वास्थ्य विज्ञान विश्वविद्यालय स्थापनाका लागि दबाब दिन १५ दिनदेखि सुदूरपश्चिममा आन्दोलन भइरहेको छ।
गेटामा विश्वविद्यालय स्थापनार्थ भइरहेको आन्दोलनलाई आगामी दिनमा थप सशक्त र प्रभावकारी कसरी बनाउने भनेर रणनीति छलफल गरिएको छ।
बुधवार धनगढीमा विभिन्न क्षेत्रका सरोकारवालासँग संघर्ष समितीले आन्दोलनको रणनीति तय गर्न सुझाव माग्न छलफल गरिएको छ। रणनीतिक छलफलमा आन्दोलनलाई निष्कर्षमा पुगाउन कसरी अगाडि बढ्ने भन्ने सल्लाह र सुझाव मागिएको छ।