धनगढी: सुदूरपश्चिम प्रदेशका आन्तरिक मामिला तथा कानून मन्त्री पृथ्वीबहादुर सिंह धर्म पत्नी अमृतासहित सोमबार धनगढीबाट गृह जिल्ला बझाङका लागि हिँडे। ६ जेठमा आन्तरिक मामिला तथा कानून मन्त्रीमा नियुक्त भएर पद बहाली गरेका मुख्यमन्त्री तथा मन्त्रिपरिषद्को कार्यालयबाट भ्रमण तालिका स्वीकृत गराएर गृह जिल्लातर्फ लागेका थिए।
मन्त्रालयका नायब सुब्बा स्तरका एकजना कर्मचारी र निजी सचिवालयका कर्मचारी समेत लिएर हिडेका मन्त्री सिंह सोमबार साँझ डडेल्धुराको राइनो होटलमा बसेका थिए। सुरक्षा स्रोतकाअनुसार डडेल्धुरामा बास बसेको होटलमै कार्यकर्ता भेटघाट गरेका मन्त्री सिंहले कुनै औपचारिक कार्यक्रममा भाग भने लिएनन्।
भ्रमण टोलीमा संलग्न कर्मचारी र परिवारका सदस्यसहित बिहान साढे ८ बजे उनी मंगलबार डडेल्धुराबाट सुपप्र ०१–००१ झ ४८० नम्बरको गाडीमा बझाङका लागि हिँडेका थिए। मन्त्री पदमा बहाली भएपछि पहिलो पटक निर्वाचन क्षेत्र जादै गरेका सिंहको गाडी दिउँसो १ बजेर ४३ मिनेटमा केदास्यु गाउँपालिका–१ को धारछडा भन्ने स्थानमा दुर्घटनामा पर्यो।
सुरक्षा स्रोतका अनुसार अगाडि प्रहरीको स्कटिङ गाडी थियो। मन्त्रीको गाडी १५ देखि २० को स्पीडमा थियो। तर एक्कासी अनियन्त्रित भएर आवाज आयो। स्कटिङले पछि हेर्दा गाडी झरिसक्या थियो। बझाङ प्रहरीले पनि अनियन्त्रित भएर एक्कासी सडकबाट ५० मिटर तल कालंगा नदीको छेउमा गाडी बजारिदा गम्भीर घाइते भएका सिंहलाई नेपाली सेनाको हेलीकोप्टर मार्फत नेपालगञ्ज लगिएको थियो। तर उनको कोहलपुर मेडिकल कलेजमा उपचारकै क्रममा मृत्यु भएको सुदूरपश्चिम प्रदेश प्रहरीका प्रमुख डिआइजी भरतबहादुर बोहराले बताए।
यस्तै, मन्त्रीकी धर्मपत्नी अमृता सिंह (वर्ष ५०) र भाउजु जयादेवी सिंह (६५) को पनि बझाङमै निधन भएको छ। गाडीमा सवार मन्त्री सिंहका निजी सुरक्षा गार्ड(पीएसओ) प्रहरी सहायक हवल्दार दिपक भण्डारी र चालक धर्मराज जोशीको भने नेपालगञ्जमा उपचार जारी छ। जयपृथ्वी नगरपालिका–१० घर भएर हाल कञ्चनपुरको बेलौरी नगरपालिकामा बसोबास गर्दै आएका मन्त्री सिंह बुधबार (भोलि) ढंगार मष्टा मन्दिर दर्शन र कार्यकर्ता भेटघाट गर्ने कार्यक्रम रहेको थियो।
मन्त्रालयकाअनुुसार बुधबार नै बझाङमा एलईवसी उद्घाटन गर्ने र कार्यालय प्रमुखहरुसँग भेटघाट गरेर निर्देशन दिने कार्यक्रम तय गरिएको थियो भने बिहीबार बिहान धनगढी फर्किने कार्यक्रम रहेको थियो। तर उनी आफ्नो निर्वाचन क्षेत्रमा नपुग्दै दुर्घटनामा परेका हुन्। गत मंसिर ४ मा भएको निर्वाचनमा प्रदेशसभा क्षेत्र नम्बर १ बाट विजयी भएका थिए। उनी एमालेका अफिलाल ओखेडालाई पराजीत गर्दै विजयी भएका थिए।