धनगढी: दार्चुलाको शैल्यशिखर नगरपालिका–६ ग्वानी क्षेत्रमा ट्रक दुर्घटना भएको छ। आज (मंगलबार) ग्वानीमा ट्रक दुर्घटना हुँदा चालक र गाडी धनि घाइते भएका छन्।
धनगढीबाट दार्चुला सदरमुकाम खलंगातर्फ जाँदै गरेको सुपप्र ०१००१ क १६९२ नम्बरको ट्रकको स्टेरिङले काम नगर्दा ट्रक दुर्घटनामा परेको हो। प्रहरीका अनुसार दुर्घटना परि घाइते हुनेमा गाडी चालक करनसिंह राना र गाडी साहु जनकराज बिष्ट रहेका छन्।
चालकको खुट्टामा चोट लागेको छ भने दुबै जनाको गोकुलेश्वर अस्पतालमा उपचार भइरहेको छ। उनीहरूको अवस्था सामान्य रहेको प्रहरीले जनाएको छ। ट्रक मंगलबार राति पौने ९ बजेतिर दुर्घटनामा परेको हो। ट्रक सडकबाट अन्दाजी २ सय मिटर तल खसेको प्रहरीले जनाएको छ। घटनाको बारेमा थप अनुसन्धान भइरहेको प्रहरीले जनाएको छ। धनगढीबाट दार्चुला सदरमुकाम खलंगातर्फ जाँदै गरेको ट्रकले चामल ढुवानी गरेको प्रहरीले जनाएको छ।