धनगढी: अमेरिकाको टेक्सासमा बस्दै आएका कैलालीको गोदावरी नगरपालिकाको मालाखेतीका दिपेन्द्र जोशी अज्ञात समूहको गोली प्रहारबाट गम्भीर रुपले घाईते भएका छन्।
टेक्सासको युलेसस्थित ग्याँस स्टेशनमा म्यानेजर पदमा कार्यरत जोशीलाई स्टेशन बन्द गरेर डेरामा फर्किने क्रममा ६ जुनको राति ११ : ३० बजे अज्ञात समूहले अन्धाधुन्ध गोली प्रहार गरेका थिए।
उक्त समूहले १२/१३ राउण्ड गोली प्रहार गरेको थियो । जसमध्ये जोशीलाई दुई वटा गोली लागेको थियो । अज्ञात समूहको आक्रमणबाट ज्यान जोगाउन सफल भएपनि दुई वटा गोली दाया हातमा लागेका कारण जोशी गम्भीर रुपले घाईते भए ।
तत्काल उनलाई उद्दार गरी युलेसको अस्पतालमा भर्ना गरियो । र, समयै अप्रेशन गरिएका कारण जोशीको ज्यान जोगियो । यद्दपि जोशीका दायाँ हातको हड्डी पूर्ण रुपमा क्षतिग्रस्त भएको छ ।
६ वर्षअघि डिभी परेर अमेरिका गएका जोशी डोटीको दीपायल सिलगढी नगरपालिकाको उडितोलाका स्थायी बासिन्दा हुन्। उनको परिवार हाल कैलालीको मालाखेतीमा बस्दै आएको छ ।