धनगढी: धनगढीमा मोटरसाइकलले कारलाई ठक्कर दिएपछि दुर्घटना भएको छ। आज (शुक्रवार) धनगढीको राजपुरस्थित ६ लेन सडकमा दुर्घटना भएको हो।
प्रदेश ट्राफिक प्रहरी कार्यालय अत्तरियाका अनुसार अत्तरियादेखि धनगढी आउँदै गरेको बागमती प्रदेश ०१०२९ च १७८३ नम्बरको कारलाई पछाडीबाट सुदूरपश्चिम प्रदेश ०१००७ प ९८२५ नम्बरको मोटरसाईकलले ठक्कर दिँदा ६ लेन सडकको धनगढी उपमहानगरपालिका–१३ मोहनपुरमा दुर्घटना भएको हो।
दुर्घटनामा मोटरसाइकल चालक कञ्चनपुरको कृष्णपुर नगरपालिका- ७ का २२ वर्षीय विक्रम राना र पछाडि सवार २१ वर्षीय दिपेन्द्र राना घाइते भएका छन्।
उनीहरूको अहिले मायामेट्रो अस्पतालमा उपचार भैरहेको प्रहरीले जनाएको छ। यस्तै ठोक्किएको कार अत्तरियाका काँग्रेस नेता एवं पत्रकार लोकराज पाण्डेय (आगो) को भएको खुलेको छ। अहिले आगोको गाडीसहित मोटरसाइकललाई प्रहरीले नियन्त्रणमा लिएको जनाएको छ।