धनगढी : धनगढीमा पछिल्लो समय मोटरसाइकल चोरीका घटना बढेका छन्। दिनहुँ मोटरसाइकल चोरीका घटना बढिरहेको प्रहरीको भनाई छ।
यसैक्रममा प्रहरीले एक समूहलाई चोरीको आरोपमा समातेको छ। आज (बुधबार) कैलाली प्रहरीले धनगढीबाट मोटरसाइकल चोर्ने दुई जनालाई सार्वजनिक गरेको छ।
यसरी पक्राउ पर्नेमा कञ्चनपुरको वेददकोट नगरपालिका वडा नम्बर–२ बसन्थलाका १८ वर्षीय सन्देश खत्री र सोही ठाउँका १८ वर्षीय लोकेश बोहरा रहेको जिल्ला प्रहरी कार्यालय कैलालीका प्रहरी नायव उपरीक्षक कबिन्द्रसिंह बोहराले जानकारी दिए।
उनका अनुसार उनीहरुले चोरेका ३ मोटरसाइकल पनि उनीहरूबाट बरामद गरिएको छ। धनगढी उपमहानगरपालिका वडा नम्बर ३ फाप्ला नजिकबाट मोटरसाइकलसहित उनीहरुलाई पक्राउ गरिएको बोहराले बताए।
उनीहरूले धनगढीको बसपार्क, धनगढी उपमहानगरपालिका ३ को स्वस्तिक अस्पताल नजिकबाट मोटरसाइकलहरु चोरेको जनाइएको छ। अहिले घटनाको प्रहरीले थप अनुसन्धान गरिरहेको छ।
