धनगढी: कञ्चनपुरमा गरगहना चोरी गरेर खरिदबिक्री गर्ने ६ जनालाई प्रहरीले पक्राउ गरेको छ।
गत मंगलबार भिमदत्त नगरपालिका–७ हल्दुखाल निवासी केशबसिंह महराको घरबाट सुनका विभिन्न गरगहना चोरी गर्ने चार जना र ती गहना खरिद गर्ने दुई जनालाई नियन्त्रणमा लिइएको जिल्ला प्रहरी कार्यालय कञ्चनपुरले जनाएको छ।
जिल्ला प्रहरी कार्यालयका प्रवक्ता प्रहरी नायब उपरीक्षक (डीएसपी) उमेशराज जोशीका अनुसार, चोरीमा संलग्न भिमदत्त नगरपालिका–६ बस्ने ३० वर्षीय राहुल चन्द, २६ वर्षीय अमित खत्री, २१ वर्षीय चक्र सुनार र १८ वर्षीय महेन्द्र नायकलाई पक्राउ गरिएको हो।
गरगहना खरिद गर्ने पसल सञ्चालक पनि पक्राउ
चोरी भएका गहना खरिद गर्ने निङ्लासैनी सुनचाँदी पसलका सञ्चालक भिमदत्त नगरपालिका–४ निवासी ३५ वर्षीय नविन पौडेल र ३२ वर्षीया इसा पौडेललाई पनि पक्राउ गरिएको डीएसपी जोशीले जानकारी दिए।
पक्राउ परेका व्यक्तिहरूबाट चोरी गरेर बिक्री गरिएका सुनका विभिन्न गरगहना फेला परेको प्रहरीले जनाएको छ। बरामद गरगहनामा सुनको छड्के तिलहरी, तीन वटा मंगलसुत्र, दुई औंठी, दुई काँटा, एउटा नागिन माला, एउटा चन्द्रमा, एउटा गलोबन्द, एउटा कानको झुम्का, एक थान चाँदीको औंठी र १६.१४ ग्राम गलाएको सुन रहेका छन्।
चोरी र खरिदबिक्रीमा संलग्नहरूलाई जिल्ला अदालतबाट ७ दिनको म्याद थप गरी थप अनुसन्धान भइरहेको प्रहरीले जनाएको छ।