कञ्चनपुर: कञ्चनपुरको गड्डाचौकीस्थित भीमदत्त नगरपालिका–११ मा लागू औषध खैरो हेरोइनसहित दुई जना पक्राउ परेका छन्। लागू औषध नियन्त्रण ब्यूरो शाखा कार्यालय महेन्द्रनगरबाट खटिएको प्रहरी टोलीले शंकास्पद व्यक्तिहरूलाई नियन्त्रणमा लिई हेरोइन बरामद गरेको हो।
प्रहरीका अनुसार पक्राउ पर्नेमा २२ वर्षीय करन पन्त र २६ वर्षीय अमित पन्त रहेका छन्। करन पन्त भारतको उत्तराखण्ड राज्यको उधमसिंहनगरका बासिन्दा हुन् भने अमित पन्त कञ्चनपुरको भीमदत्त नगरपालिका–५, सुखासालका स्थानीय हुन्।
प्रहरी टोलीले विशेष सूचनाका आधारमा सेतो रङको युके ०६ डीबी ८३८९ नम्बरको टीभीएस १२५ सीसी मोटरसाइकलमा भारतबाट नेपालतर्फ आउँदै गरेका उनीहरूलाई गड्डाचौकीमा रोकी जाँच गर्दा मोटरसाइकलको साइड प्यानलभित्र खुकुरीको डिब्बामा सेतो प्लास्टिकमा बेरिएको अवस्थामा १.७९ ग्राम शुद्ध खैरो हेरोइन बरामद गरेको हो।
लागू औषधसहित पक्राउ परेका दुवै जनालाई थप अनुसन्धान तथा कारबाहीका लागि जिल्ला प्रहरी कार्यालय कञ्चनपुरमा बुझाइएको छ।
यस्तै कञ्चनपुरको भीमदत्त नगरपालिका–११ गड्डाचौकीमै लागू औषध खैरो हेरोइनसहित ४ जना पक्राउ परेका छन्। लागू औषध नियन्त्रण ब्यूरो शाखा कार्यालय महेन्द्रनगरबाट खटिएको प्रहरी टोलीले तीन फरक घटनामा उनीहरूलाई पक्राउ गरेको हो।
बिहान २ बजे, कञ्चनपुरको भीमदत्त नगरपालिका–११ गड्डाचौकीमा लागू औषध खैरो हेरोइनसहित हरेन्द्र सिंह बडाल (२६) र तेज बहादुर बिक (२४) लाई पक्राउ गरिएको छ। दुबै जना भीमदत्त नगरपालिका–८ तिलाचोरका बासिन्दा हुन्। प्रहरीले कालो-निलो रङको पल्सर मोटरसाइकल (सु.प.प्र.०२००३ प ७१५६) मा भारतबाट नेपालतर्फ आइरहेका उनीहरूलाई नियन्त्रणमा लिई चेकजाँच गर्दा हरेन्द्रले लगाएको सेतो चप्पलको पैतलामा सेतो प्लास्टिकमा बेरिएको अवस्थामा २.७१ ग्राम शुद्ध खैरो हेरोइन बरामद गरेको हो।
दिउँसो ५ बजे, कञ्चनपुरको भीमदत्त नगरपालिका–११ गड्डाचौकीमा ग्रे रङको एनएस १६० मोटरसाइकल (सु.प.प्र.०२००३ प ७४२७) चलाई नेपालतर्फ आइरहेका आयुष पाल (२०) र हरिश जोशी (१७) लाई पनि पक्राउ गरिएको छ। चेकजाँच गर्दा हरिशले लगाएको सेतो रङको जुराब भित्र सेतो प्लास्टिकमा बेरिएको अवस्थामा ९१० मि.ग्राम शुद्ध खैरो हेरोइन फेला परेको प्रहरीले जनाएको छ। पक्राउ परेका आयुष पाल भीमदत्त नगरपालिका–१८ का हुन् भने हरिश जोशी भीमदत्त नगरपालिका–६ का हुन्।
