धनगढी : धनगढीका निजी विद्यालय र अस्पतालहरुले जथाभावी शुल्क असुलिरहेको भन्दै अनेरास्ववियुले उपमहानगरपालिकाको ध्यानाकर्षण गराएको छ ।
बिहीबार नगर प्रमुख गोपाल हमाललाई ध्यानाकर्षण पत्र बुझाउदै अनेरास्ववियु कैलालीले शिक्षा र स्वास्थ्य क्षेत्रमा निजी संघसंस्थाले लिइरहेको शुल्क रोकेर मापदण्ड बनाउन माग गरेको हो ।
कक्षा १ देखि १२ सम्म अध्यापन गराउने विद्यालय र १५ शैयासम्मका अस्पताल उपमहानगरपालिकाको अधिकार क्षेत्रभित्र पर्ने भएकाले शुल्क सम्बन्धी मापदण्ड बनाएर जथाभावी असुलीभइरहेको रोक्न माग गरिएको छ ।
अनेरास्ववियुका जिल्ला संयोजक रोहित बोगटीले हस्ताक्षर गरेको ध्यानाकर्षण पत्रमा नगर शिक्षा ऐनमा विद्यालयले लिने शुल्कका विषयमा कुनै कुरा उल्लेख नगरिएको र मापदण्ड समेत नभएकाले निजी विद्यालयले अभिभावकको ढाड सेक्नेगरी शुल्क लिइरहेकाले रोक्न भनिएको छ ।
नगर शिक्षा ऐनमा कुल विद्यार्थीको १० प्रतिशतलाई छात्रवृत्ति दिनुपर्ने उल्लेख भएपनि नदिएको, मापदण्डअनुसार भौतिक संरचना नबनेको, धनगढीमा अनुमती नलिएर निजी अस्पताल सञ्चालन गरिएको, स्वास्थ्यको मापदण्ड नपुुगाएको, १५ शैयाको अनुमती लिएका अस्पतालले ५० शैयासम्म सञ्चालन गरिरहेकाले कारवाहीको दायरामा ल्याउन माग गरिएको छ ।
अस्पतालले स्वीकृत शैयाको १० प्रतिशत लक्षित समूहलाई निःशुल्क भनिएपनि केही बाहेकका अस्पतालले उक्त व्यवस्था कार्यान्वयन नगरेको तत्काल कार्यान्वयनमा ल्याउन माग गरिएको छ ।
अनेरास्ववियुका केन्द्रीय सदस्य तथा कञ्चनपुर इन्चार्ज किशोर शाहले सुुदूरपश्चिमकै मुटुु धनगढीमा निजी विद्यालय र अस्पतालहरुले मनोमानी गरिरहेको पाइएकाले अनेरास्ववियुले मेयर हमालको ध्यानाकर्षण गराएको बताए । शाहले उपमहानगरपालिका नियमनकारी निकाय भएकाले तत्काल ध्यानाकर्षण गराइएको बताउदै माग सम्बोधन नभएमा कडा आन्दोलनमा जान अनेरास्ववियु बाध्य हुने बताए ।
पत्र सहित:
