काठमाडौं: नेपाल प्रहरीको ३१औं महानिरीक्षक (आइजीपी) मा दिपक थापा मंगलबारमात्रै निवास सर्ने भएका छन्। सरकारले चैत ४ गतेदेखि थापालाई प्रहरीको नेतृत्व सम्हाल्ने जिम्मेवारी दिएको हो। उनै थापाले मंगलबार शुभ साइत पारेर सरकारी निवासमा सर्ने तयारी गरेका छन्।
बालुवाटारमा सोमबार बसेको क्याबिनेट बैठकले केन्द्रीय अनुसन्धान ब्युरो (सिआइबी) मा उत्कृष्ट प्रदर्शन र वरियताका आधारमा थापालाई ७६ हजार प्रहरी फौजको नेतृत्व दिने निर्णय गरेको थियो। भक्तपुर निवासी थापा केही वर्षदेखि ललितपुरको भैंसेपाटीस्थित निजी निवासमा बस्दै आएका छन्।
नयाँ आइजीपी थापाले एआइजीद्वय सुदीप गिरी र टेकबहादुर तामाङलाई पछि पार्दै नेतृत्व हात पारेका हुन्। थापा सबैसँग मिलनसार र निडर व्यक्तित्वका रूपमा चिनिन्छन्।
नक्सालस्थित प्रहरी प्रधान कार्यालयमा रहेको सरकारी निवासमा सर्ने तयारी भए पनि मर्मत सम्भार नसकिएकाले उनले मंगलबार मात्रै सर्ने भएका छन्। सोमबार नै सर्ने योजना भए पनि घर मर्मत नपुगेकाले ढिलाइ भएको हो।
यसबीच हिजोमात्र थापाले राजावादीका नाममा अराजक गतिविधि तथा गुण्डागर्दी नियन्त्रणमा निर्मम हुन देशभरका प्रहरी कमाण्डरलाई निर्देशन दिएका छन्।
प्रहरी मुख्यालयमा भर्चुअल माध्यमबाट उनले देशभरका प्रहरी कमाण्डरलाई सम्बोधन गर्दै शान्ति सुव्यवस्था कायम राख्नु र जीउधनको सुरक्षा गर्नु प्रहरीको प्रमुख जिम्मेवारी भएको सम्झाएका थिए।
आईजीपी थापाले आ-आफ्नो क्षेत्रमा कुनै पनि आपराधिक क्रियाकलापका घटनाहरू हुन नदिन प्रभावकारी सुरक्षा व्यवस्था मिलाउनु पर्ने र आपराधिक गतिविधिको सूचना संकलन तथा विश्लेषण गरी आवश्यक सुरक्षा रणनीति सँगै प्रहरी परिचालनमा कटिबद्ध हुन निर्देशन दिएका छन्।